खोटाङ मा अपाङ्गताको नक्कली पत्र बनाएर सहयोग माग्दै हिँड्ने दुई युवकलाई प्रहरीले पक्राउ गरेको छ।
शहीद लखन गाउँपालिका गाउँकार्यपालिका गोरखाले आर्थिक सहयोग गरी दिन भनी उपलब्ध गराएको नक्कली पत्र लिएर स्थानीयवासीसँग चन्दा माग्दै हिँड्ने दुई युवकलाई प्रहरी कार्यालय ऐसेलुखर्कले सोमबार पक्राउ गरेको हो ।
बारा जितपुर सिमरा उपमहानगरपालिका(५ गढीमाईका १९ वर्षीय अजयराम चमार र जितेन्दरराम चमार रहेको जिल्ला प्रहरी कार्यालयका सूचना अधिकारी मोहन पोखरेलले जानकारी दिए। ‘शहीद लखन गाउँपालिकामा ९ वटा मात्रै वडा छ। उनीहरूले प्रयोग गर्दै आएको आर्थिक सहयोगको पत्रमा वडा नं। ११ लेखिएको छ’, उनले भने, ‘पत्रमा उनीहरू जन्मदेखि लाटो र कान नसुन्ने भनेर लेखिएको रहेछ। तर, उनीहरू मजाले बोल्ने र सुन्ने क्षमताका छन् । त्यसैले उनीहरू दुवै जनालाई पक्राउ गरेर कारबाहीका प्रक्रिया अगाडि बढाएका छौँ।’
शहीद लखन गाउँपालिका वडा नं ११ ले आर्थिक सहयोगका लागि भनेर दिएको पत्रमा वडाध्यक्षले मङ्सिर १० गते हस्ताक्षर गरेर सिफारिस दिएको देखिन्छ । तर, सिफारिसपत्रमा हस्ताक्षर गर्ने वडाध्यक्षको नाम भने उल्लेख छैन ।
पक्राउ परेका दुवै जनाविरुद्ध अवैध चन्दा ऐनअन्तर्गतको कसुरमा खोटाङ जिल्ला अदालतबाट तीन दिनको म्याद थप गरेर अनुसन्धान थालिएको प्रहरीले जनाएको छ।
प्रहरीले उनीहरूको साथबाट विभिन्न कागजपत्र, नक्कली बिरामीको फोटो र नगद १७ हजार बरामद गरेको जनाएको छ। पक्राउ परेका उनीहरूले एक जना व्यक्तिबाट बढीमा एक हजारसम्म सहयोग रकम भनेर लिएको देखिएको प्रहरीले जनाएको छ। उनीहरू दुवै जनामाथि कीर्ते जालसाजीसम्बन्धी मुद्दामा अनुसन्धान सुरु गरिएको जिल्ला प्रहरी कार्यालयका प्रमुख प्रहरी नायब उपरीक्षक प्रतीक विष्टले जानकारी दिए।
