निर्देशक कृषा चौलागाईंले आफ्नो पछिल्लो फिल्म ‘पिताम्बर’को अफिसियल पोस्टरसँगै रिलिज डेट पनि फिक्स गरेकी छिन। कृषाले शुक्रबार फिल्मको पोस्टर सार्वजनिक गर्दै रिलिज मिति घोषणा गरेकी हुन्। दयाहाङ राई, प्रदिप खड्का र सौगात मल्लको मुख्य भूमिका रहेको फिल्म आगामी चैत २९ गतेबाट रिलिज हुने भएको छ।
‘पिताम्बर’लाई आफ्नो ड्रिम प्रोजेक्ट बताउदै आएकी कृषाले फिल्मको छायांकन ७० दिन लगाएर सकेकी हुन्। त्यसो त भर्खरै सार्वजनिक भएको पिताम्बर पोस्टर पनि निकै आकर्षक बनाएकी छिन कृषाले। पोस्टरमा फिल्मका मुख्य तीन कलाकार प्रदीप खड्का, सौगात मल्ल र दयाहाङ राई फिचर्ड छन् । रगताम्मे बनेका प्रदीपले प्रमुख स्थान पाएको पोस्टरमा आक्रामक शैलीमा बन्दुक चलाइरहेका सौगात देखिन्छन् ।
दयाहाङको अनुहारमा भने रिस देखिन्छ । पोस्टरबाट नै निर्माण टिमले फिल्म एक्सनप्रधान रहेको प्रष्ट पारेको छ । पोस्टरले दर्शकलाई आकर्षित गर्नसक्ने देखिएको छ ।
अब ‘पिताम्बर’मा यी ३ सुपरस्टारहरु बीचको घम्साघम्सीले कुन रुप लिन्छ भन्ने हेर्नलाई दर्शकले चैत २९ गते नै पर्खनु पर्ने हुन्छ। जे होस पोस्टरले अहिले आम दर्शक बीच एक प्रकारको उत्साह राखिसकेको छ।
५ करोडको बजेटमा बनेको ‘पिताम्बर’मा सौगात, प्रदीप र दयाहाङ अलावा दिव्या रायमाझि, अनुपविक्रम शाही, सुरक्षा पन्त, प्रमोद अग्रहरी, दिव्यदेव, सुपुष्पा भट्ट, कामेश्वर चौरासिया, गौरव विष्ट, विशाल पहारी लगायतका कलाकारको अभिनय रहेको छ ।
फिल्मलाईलाई पुरुषोत्तम प्रधानले खिचेका छन् भने विशाल चौलागाईले फिल्ममा लगानी गरेका छन। फिल्ममा प्रदीप भारद्धाजको लेखन र हिमाल केसीको द्धन्द्व निर्देशन रहेको छ।
