सन् २०२६ फिफा विश्वकप सुरु हुन केही दिन मात्रै बाँकी रहँदा अमेरिकी पुरुष राष्ट्रिय फुटबल टोली (USMNT) ले आफ्नो विश्वकप तयारीलाई तीव्र बनाएको छ। टोलीले क्यालिफोर्नियाको इरभिनस्थित ग्रेट पार्क स्पोर्ट्स कम्प्लेक्समा प्रशिक्षण सुरु गरेसँगै मिडियाको चासो पनि उच्च बनेको छ।
अमेरिकी फुटबल महासंघले विश्वकप तयारी कभर गर्न चाहने तर फिफाको आधिकारिक मान्यता (एक्रिडिटेसन) नपाएका सञ्चारकर्मीहरूका लागि समेत बेस क्याम्पको ढोका खुला गरेको छ। महासंघले शनिबार सार्वजनिक गरेको सूचनाअनुसार गैर-फिफा मान्यता प्राप्त पत्रकारहरूले विशेष आवेदन प्रक्रियामार्फत प्रशिक्षण सत्र तथा खेलाडी अन्तर्वार्तामा पहुँच पाउनेछन्।
विश्वकप टोलीले जुन ८ देखि इरभिनमा औपचारिक प्रशिक्षण थालेको हो। पहिलो दिन समुदायसँग प्रत्यक्ष जोडिने कार्यक्रम राखिएको छ, जहाँ राष्ट्रिय टोलीका खेलाडीहरूले समर्थक र सञ्चारकर्मीसँग भेटघाट गर्नेछन्। खेलाडीहरू बिहान १० बजेदेखि सञ्चारमाध्यमसँग संवादका लागि उपलब्ध रहने जनाइएको छ।
जुन ९ देखि ११ सम्म हरेक दिन चयनित खेलाडीहरूको मिडिया ब्रिफिङ र प्रशिक्षण सत्र आयोजना हुनेछ। प्रशिक्षणका प्रारम्भिक
मिनेट सञ्चारमाध्यमका लागि खुला रहने व्यवस्था गरिएको छ।
महासंघले फिफाको आधिकारिक मान्यता प्राप्त पत्रकारहरूलाई भने छुट्टै आवेदन आवश्यक नरहेको जनाएको छ। उनीहरूले फिफा मिडिया च्यानलमार्फत मात्र आफ्नो उपस्थितिको जानकारी गराउनुपर्नेछ।
यसैबीच, विश्वकप खेल हुने लस एन्जलस स्टेडियमसम्म मिडियाका लागि निःशुल्क सटल सेवाको व्यवस्था समेत गरिएको छ। सुरक्षा व्यवस्थालाई ध्यानमा राख्दै सबै सञ्चारकर्मीलाई समयअघि नै पुग्न आग्रह गरिएको छ।
आयोजक राष्ट्रमध्ये एक अमेरिकाले विश्वकपअघि राष्ट्रिय टोलीलाई केन्द्रमा राखेर समर्थक, समुदाय र सञ्चारमाध्यमलाई जोड्ने रणनीति अघि सारेको देखिएको छ। विश्वकपको माहोल तातिरहेका बेला अमेरिकी टोलीको बेस क्याम्प अहिले खेलाडी, समर्थक र पत्रकारहरूको प्रमुख आकर्षण बनेको छ।
