वीरगञ्ज । वीरगञ्जमा दुई समुदायबीच उत्पन्न तनावका कारण जारी कर्फ्यू मंगलबार साँझ ६ बजेसम्म लम्ब्याइएको छ। आइतबारदेखि धार्मिक तथा सामाजिक विषयलाई लिएर प्रदर्शन चर्किएपछि प्रशासनले सोमबार साँझदेखि कर्फ्यू लागू गरेको हो।
पहिले बिहान ८ बजेसम्म तोकिएको कर्फ्यू दिउँसो १ बजेसम्म विस्तार गरिएको थियो भने पुनः थप गरी साँझ ६ बजेसम्म पुर्याइएको जिल्ला प्रशासन कार्यालय पर्साले जनाएको छ।
कर्फ्यू वीरगञ्ज महानगरको बसपार्क–नगवा–इनर्वा क्षेत्रदेखि सिर्सिया नदी, गण्डक चोकदेखि शंकराचार्य गेटसम्म लागू छ। यस अवधिमा भेला, सभा, जुलुस र प्रदर्शन निषेध गरिएको छ।
अत्यावश्यक सेवा बाहेक घरबाहिर ननिस्कन प्रशासनले आग्रह गरेको छ। एम्बुलेन्स, दमकल, स्वास्थ्यकर्मी, सञ्चारकर्मी लगायत अत्यावश्यक सवारी साधनलाई भने सुरक्षाकर्मीले सहजीकरण गर्ने जनाएको छ।
