काठमाडौं । राष्ट्रिय सभा निर्वाचनलाई लक्षित गर्दै प्रमुख तीन दल नेपाली कांग्रेस, नेकपा एमाले र नेपाली कम्युनिस्ट पार्टी (नेकपा) बीच चुनावी तालमेलको प्रयास तीव्र बनेको छ। यसैक्रममा आज बिहान एमाले अध्यक्ष केपी शर्मा ओली र माओवादी केन्द्रका संयोजक प्रचण्डबीच भेटवार्ता भएको छ।
भेटमा राष्ट्रिय सभा निर्वाचनमा तालमेल गर्ने विषयमा छलफल भएको जनाइए पनि सहमति भए नभएकोबारे औपचारिक रूपमा केही सार्वजनिक गरिएको छैन।
यसअघि हिजो पनि ओली प्रचण्ड भेटको तयारी भए पनि प्रचण्ड काठमाडौं बाहिर रहेकाले भेट हुन नसकेको एमाले केन्द्रीय कार्यालयका सचिव डा। भीष्म अधिकारीले जानकारी दिए। उनका अनुसार प्रचण्डको उडान ढिलाइ हुँदा भेटवार्ता स्थगित भएको थियो। प्रचण्ड आइतबार भारतको नयाँदिल्ली प्रस्थान गर्नुअघि ओलीसँग भेट गरेका थिए।
माओवादी केन्द्रका नेता वर्षमान पुनले राष्ट्रिय सभा निर्वाचनको सन्दर्भमा प्रमुख दलहरूबीच निरन्तर छलफल चलिरहेको बताए। प्रमुख तीन दल मिलेर चुनाव लड्ने तयारी हो भन्ने प्रश्नमा उनले भने, “कांग्रेसको तर्फबाट त्यस्तो प्रस्ताव आएको छ।”
उनले तालमेलका विषयमा छलफल भएको स्वीकार गर्दै भने, “अहिलेसम्म कुनै ठोस टुंगो लागिसकेको छैन।”
राष्ट्रिय सभाका १९ जना सदस्यको कार्यकाल आगामी फागुन २० गते सकिँदैछ। त्यसअघि हुने निर्वाचनका लागि दलहरूबीचको सम्भावित तालमेललाई राजनीतिक वृत्तले चासोका साथ हेरिरहेको छ।
