जनकपुरधाम । विश्वासको मत सुरक्षित गर्न कठिन हुने प्रष्ट बुझेपछि मधेश प्रदेशका मुख्यमन्त्री सरोजकुमार यादव राजीनामा दिने निर्णयमा उभिएका छन्। उनले प्रदेश सभाको अगाडि आफ्नो धारणा राखेपछि पद छाड्ने तयारी मिलाइरहेका छन्।
आज बिहान साढे ८ बजेका लागि आह्वान गरिएको प्रदेश सभा बैठक निर्धारित समयमा सुरु हुन नसक्दा कार्यसूची अगाडि बढेन। मुख्यमन्त्री स्वयं बैठकमा उपस्थित नहुँदा बैठक स्थगित गर्दै दिउँसो २ बजेसम्म सारिएको हो।
प्रदेश सभाको विद्यमान शक्ति–समिकरणले पनि मुख्यमन्त्री यादवले विश्वासको मत पाउने सम्भावना न्यून देखिएको विश्लेषण गरिएको छ। १०७ सदस्यीय सभामा विश्वासको मत कायम राख्न ५४ मत आवश्यक छ। तर सरकारको नेतृत्व गरिरहेको एमालेसँग सभामुखसहित २५ सांसद मात्र छन्, जसमा एक सांसद निलम्बित अवस्थामा छन्। एमालेलाई साथ दिइरहेको नेपाल संघीय समाजवादी र राप्रपासँग पनि एक–एक सिट मात्रै छ, जसले बहुमतसम्म पुग्ने सम्भावनालाई अझै कमजोर बनाएको छ।
यसै कारण मुख्यमन्त्री यादवले राजनीतिक समीकरण उल्टिन नसक्ने देखेपछि राजीनामातर्फ उन्मुख भएका छन्।
