काठमाडौं । सरकारले लागूऔषध नियन्त्रण तथा रोकथामका लागि छुट्टै विभाग स्थापना गर्ने तयारी गरेको छ ।
लागूऔषध नियन्त्रण तथा ओसारपसारविरुद्धको अन्तर्राष्ट्रिय दिवसको अवसर पारेर गृह मन्त्रालयमा शुक्रबार आयोजित कार्यक्रममा बोल्दै गृहसचिव राजकुमार श्रेष्ठले यस्तो बताएका हुन् । उनले लागूऔषध नियन्त्रण र रोकथामका लागि संघ, प्रदेश र स्थानीय तहको कामलाई नीतिगत रुपमा नै जागरुक गराउन उक्त विभाग स्थापना गर्ने तयारीमा सरकार अघि बढ्नुपरेको पनि स्पष्ट पारेका छन् ।
गृहसचिव श्रेष्ठले लागूऔषध दुर्व्यसनीको सुधार तथा उपचारका लागि पुनःस्थापना केन्द्र सञ्चालन गर्दा न्यूनतम मापदण्ड पूरा गर्न पनि सम्बन्धित पक्षलाई निर्देशन दिएका छन् । उनले लागूऔषध नियन्त्रण तथा रोकथामको क्षेत्रमा आवद्ध सबै संस्थाहरुलाई सरकारसँग आवद्ध हुन पनि सचेत गराए ।
गृहसचिव श्रेष्ठले प्रदेश र स्थानीय तहलाई पनि लागूऔषध नियन्त्रण तथा रोकथामको अभियानमा सक्रियतापूर्वक लाग्न पनि आग्रह गरेका छन् ।
