काठमाडौँ । कक्षा १२ को नतिजा सार्वजनिक भएपछि विभिन्न तहबाट उठेका प्रश्न र जिज्ञासालाई सम्बोधन गर्न शिक्षा, विज्ञान तथा प्रविधिमन्त्री सस्मित पोखरेलले विशेष समिति गठन गरिएको जानकारी दिएका छन्।
मन्त्री पोखरेलका अनुसार उत्तरपुस्तिकाको नमुना परीक्षण तथा परीक्षाफलसँग सम्बन्धित डेटा इन्ट्री र मूल्याङ्कन प्रक्रियाको सत्यापन गर्न समिति बनाइएको हो। उक्त समितिमा शिक्षा तथा खेलकुद मन्त्रालय र पाठ्यक्रम विकास केन्द्रका उपसचिवस्तरका प्रतिनिधिहरू समावेश छन्।
सामाजिक सञ्जालमा राष्ट्रिय परीक्षा बोर्डको नतिजा प्रक्रियाबारे भइरहेका टिप्पणी र आलोचनालाई ध्यानमा राख्दै सरकारले तथ्यपरक अध्ययनका लागि यो कदम चालेको मन्त्रीको भनाइ छ। उनले बोर्डले अपनाएको नतिजा प्रकाशन प्रक्रिया पारदर्शी र विश्वसनीय रहेको दाबी गर्दै आवश्यक जनशक्ति परिचालन र प्रशासनिक प्रक्रिया सहज बनाएर समयमै नतिजा सार्वजनिक गरिएको स्पष्ट पारे।
मन्त्री पोखरेलले नतिजा प्रकाशनमा कुनै प्रकारको हतारो नगरिएको उल्लेख गर्दै निर्धारित कार्यविधिअनुसार नै सम्पूर्ण प्रक्रिया सम्पन्न भएको बताए।
