काठमाडौं । नेपाल बन्दको आह्वानसँगै देशका विभिन्न स्थानमा तनावपूर्ण अवस्था देखिइरहेका बेला भैरहवाको लुम्बिनी गेट नजिक बुधबार बिहान एउटा शंकास्पद वस्तुले स्थानीयलाई झस्कायो।
सडक किनारमा राखिएको बोरा र त्यसको बाहिर टाँसिएको “नेपाल बन्द सफल पारौं” लेखिएको कागजले सर्वसाधारणको ध्यान तानेको थियो। सम्भावित जोखिमलाई ध्यानमा राख्दै सुरक्षाकर्मीले तत्काल सो क्षेत्रको सवारी आवागमन रोके। केहीबेर त्यहाँ त्रास र जिज्ञासाको मिश्रित वातावरण देखिन्थ्यो।
घटनास्थलमा पुगेको नेपाली सेनाको टोलीले सावधानीपूर्वक उक्त वस्तु निष्क्रिय पार्यो। तर, जाँचपछि बाहिर आएको तथ्यले सबैलाई आश्चर्यचकित बनायो— त्यो कुनै विस्फोटक पदार्थ नभई क्यान बियरको बोतलभित्र माटो र ढुङ्गा भरिएको मात्र थियो।
रुपन्देही प्रहरीले यसलाई सर्वसाधारणलाई तर्साउने नियतले राखिएको हुनसक्ने प्रारम्भिक निष्कर्ष निकालेको छ।
उता, फागुन २१ को चुनाव बहिष्कारको मागसहित नेकपा बहुमतले आह्वान गरेको बन्दका कारण जिल्लाभर शिक्षण संस्था ठप्प छन्। सवारी साधन चलेका छैनन् भने बजार पनि सुनसान देखिएका छन्।
एक सामान्य बियरको बोतलले केहीबेरका लागि पुरै क्षेत्रलाई त्रासमा राखेको यो घटनाले बन्दका दिनहरूमा फैलने अफवाह र डरको मनोविज्ञानलाई पुनः उजागर गरेको छ।
